Akademik V.Q. nomidagi texnika yo‘nalishi bo‘yicha o‘quv zali (217-xona).

Vosil Qobulovich Qobulov — matematik olim, O‘zbekiston Fanlar akademiyasi akademik, fizika matematika fanlari doktori, professor, O‘zbekistonda xizmat ko‘rsatgan fan va texnika arbobi. V.Q.Qobulov 1921-yil 5- sentabrda Toshkent shahrida tug’ilgan. 1938- yilda o‘rta maktabni bitirib, O‘rta Osiyo davlat dorilfununining mexanika-matematika fakultetiga o’qishga kirgan. 1941-yili armiya safiga xizmatga chaqirilishi munosabati bilan dorilfununda o’qish to’xtatilgan. 1941-1945yillarda V.Q.Qobulov Ikkinchi jahon urushi qatnashchisi bo’lgan. 1945-yil urushdan qaytgach, o’qishni Toshkent temir yo’li transporti muhandislari oliygohida qurilish fakultetida davom ettirgan. 1948-yili o’qishni tugatib, Chorjo’y-Qo’ng’irot temir yo’li qurilishida ishlagan. 1950-yil O‘zbekiston Fanlar akademiyasi Inshootlar institutida aspirant, ilmiy xodim (1950-57), O‘zbekiston Fanlar akademiyasi Matematika institutining hisoblash texnikasi bo‘limi mudiri (1957—63), O‘zbekiston Fanlar akademiyasi Mexanika instituti va hisoblash markazi direktori (1963—66). O‘zbekiston Fanlar akademiyasi Kibernetika instituti direktori (1966—77), institut O‘zbekiston Fanlar akademiyasi ning «Kibernetika» ilmiy ishlab chiqarish birlashmasiga aylantirilgach, uning bosh direktori (1978—92) bo‘lib ishlagan.Ilmiy ishlari hisoblash texnikasini fan, texnika va xalq xo‘jaligining turli sohalariga joriy etish bilan bog‘liq. Beruniy nomidagi O‘zbekiston davlat mukofoti laureati (1971). «El-yurt hurmati» ordeni bilan mukofotlangan (1998).
O‘zbekiston Respublikasi Prezident Admistratsiyasi raxbariyati tomonidan ilm-fanning yetuk vakili Qobulov Vosil Qobulovich tavalludining 100 yilligi munosabati bilan uning nomini abadiylashtirish, ilmiy amaliy konferensiyalar o‘tkazish, ilmiy to‘plamlar va kitob albomlar nashr etish tadbirlarini yuqori saviyada tashkil etish bo‘yicha zarur chora tadbirlar ko‘rish topshirig’iga binoan Toshkent davlat transport universiteti Axborot-resurs markazining talabalar o‘quv zaliga “Akademik V.Qobulov nomidagi texnika yo‘nalishi bo‘yicha talabalar o‘quv zali” nomi berildi. Ushbu o‘quv zal 120 o‘ringa mo‘ljallangan bo‘lib, zal fondi 10 mingdan ziyod, bundan tashqari bepul internet tarmog’i hamda 14 ta so’ngi rusumdagi kompyuterlar bilan jihozlangan. Fond o‘z ichiga talabalar uchun zarur bo‘lgan darsliklar, o‘quv qo‘llanmalar, ma’lumotnomalar, lug‘atlar, davriy nashrlarni qamrab olgan. Kitobxonlar o‘quv zali katalogidan o‘zlariga zarur bo‘lgan adabiyotlarni topib, yagona kitobxonlik guvohnomasi bilan buyurtma asosida kitobni oladilar va zalning o‘zida foydalanish huquqiga egadirlar.